Incubi

Gò un’amigo che gà i incubi de note,
par mi el imbriagà, el beve come na bote.
Na note el sogna ea so vissina, na bruta tardona
che de esser radioamator no a ghe perdona.
Par farghe dispeto sta bruta infame
ga tajà el coassial a fete come el saeame
pò el sogna che un stormo de cocai
se gà posà sul’antena e gà piegà i radiai
ma el peso gera che un OM se lagnava
che no lo sentiva,
ma a spussa dei schiti rivava.
N’altra volta intanto che iù dormiva
el so vissin che smontava a diretiva
el dì dopo sto bruto becamorto
gà fato i paeti par i pomodori dell’orto
e QSL na note gà fato a rivolta
pensar che el ghè n’à na bea raccolta
anca quee dei coegamenti più bei
xè andà in aria svoeando come stornei
xè capità che i tarli gà rosegà e radio
invesse da far tanti busi sull’armadio
el pensa “desso cossa pol capitarme?”
Transistor e condensatori magnai dae tarme!
Diodi e resistense tuti quanti magnai
compresi anche i circuiti stampai
Gà portà tuto dal bon COJ
che gà dà un’ociada sensa voer schei
e co na frase lo gà distruto
“qua te toca butar via tuto”.
E so mujer no capiva parchè el se gà alsà ridendo
quando el se gà svegià da sto incubo tremendo
quel giorno el gà giurà sora tutti i santi
de no magnar più de sera robe pesanti
e sopratuto de no ciapar sono davanti ai aparati
sperando de coegar l’isola dei kiribati.
by Renzo IK3VVA